أنا عندي بنت

انا عندي بنت...... تداريني
جوه عينها السود....تخبيني
من بحور الخوف.. تعديني
فوق جبال النور... ترسيني
تضحك الحلوة ...تخليني
راضي عن يومي ...وعن بكره
ساكنه جوه القلب...بدون اجره
بابها متوارب ...وانا الأكره
حته م الجنه ... يجوز أحلى
كل ما تكبر...تكون أحلى
عينها ساقية تدور ...وانا العطشان
ضحكها كستور ...في ليل بردان
كل كلمة تقول...ملاغيه
انت لو مشغول...أكيد ليا
عيش وعيشني... ولو ثانيه
ولو رضي بكره... تراضيني
راضيه بالمقسوم ...ولو" صيني "
كلمتك بتجيب ...وبتودي
زي شمس تغيب ...بلون وردي
زي بياع فل ... و معدي
انا عندي بنت...بشوف بيها
دنيا في خيالي...اطير فيها
عن عيون الناس... أخبيها
جوه نني العين... أداريها
لو وقعت في يوم ..مسنداني
بس بردو كتير...معنداني
أنا عندي بنت . وم الآخر
صابر ومتحمل على الاخر
لجل اشوفها ف يوم بتتقدم
واشوف احلامي تتآخر.