مش موافق

انا مش موافق ان الشعر حاله!
ان الكلام والآلام والوئام
يبقى في لحظة لنسجام
إرتجاله .!
 إستحاله!

الشعر ياساده
زي العباده
زي شربات الفرح
زي حبات السبح
زي صرخة أم
 لحظة ولادة .

الشعر ثورة على الكلام
فوران يخلي فرحتك
يوم مولدك
زي الدمار اللي تخلفه
 لحظة إباده.

الشعر حاله
وانا اللي عشقي لكدبتي خلاني شاعر
بموت وأغير وجهتي من غير أوامر
ولما يزداد الحنين
ماعرف منين !
 بعود وارتجل من جديد كل المشاعر.

خبر عاجل - في وفاة الطفلة ماجي مؤمن ( شهيدة حادثة الكنيسة البطرسيه )

لكل من له حبيب بايت في حضنه
وكل واحد في السرير دفيان
وأي واحد ضامن بأنه 
عايش وقت الخطر في آمان
يا شريطه سوده مايله عالشاشه
يا مذيعة بملابس حداد
بتقول كتير عن اللي قتل
واللي اتقتل
واللي كلامه معبي جوف السكات.
جف الكلام في الحلق
غربت شمسنا في الشرق.

ياهلترى الموت ده راضي عننا
ولا الضريبة لسه ماندفعتش!
ياهلترى الأمل .. زعلان زيينا !
ولا الأماني لسه ماكتئبتش

مع السلامة يافصلي , يا اصحابي
مع السلامه ياكل اللي عايز يعيش
خدوا بالكم م اللعب في غيابي
انا طالعه لربنا...يمكن ماجييش..

الخلاصة

وكل اللي بنيته انهار
في أول هزه لكياني
ياضحكة تشق قلبي أنهار
ياقتلاني وأنا الجاني 

عتاب

كل اللي فاضل شوية رِضى
في زمن كل شيء جاحد
ياشعب بيراضي العِدا
وبيكيدُه نكون واحد !

سيلفي

يا واقفين في العبط طوابير
ومتجوزين الهبل عرفي
لو متم نلاقي في الجرانين 
صوركم مع عزرائيل سيلفي

الحب

الحُب مش لحظة لُقا
ولا كارت دعوه للسعاده ْ
الحب تحديد للرُؤى
جنين بيشتاق للولاده ْ

إلى روح "أشواق النعيمي " المعلمة العراقية التي رفضت تدريس مناهج داعش في المدرسه فأعدموها رمياً بالرصاص !

دخل الخواجه بعِمتُه
سرق الفرح م الناس 
دجال وبان على جبهتُه
شيطان رجيم خناس
وعشان ما يرضَى حضرتُه
أرض الفرات تنداس
رحل وساب جزمتُه
تلحسها ناس أنجاس
وعشان مايُسبُك لِعبتُه
لجل الدولار والجاز
جاب الشيطان ينجدُه
من بين أيدين الناس
عيل خسيس، بَغْدِدُه
عَيِنْ عليه حُراس
دبح الغلابه في حتتُه
بأيدين سفيه نخاس
قرر يسيب بصمتُه
تقراها في الكراس
وقفت له بنت ف سِكتُه
راس مالها كان إخلاص
راس ماله كان خِستُه
حبة بارود و رصاص
ضغط الزناد بقوته
ضغط الزناد بحماس
عاش الذليل بجرمتُه
وضيع مابين الناس
ماتت بتكتب قصته
ماتت رفيعة الراس .

فانتازيا

نص الكوبايه المليان
بيمسي عالنص الفاضي
ويقوله أنا تحتك غرقان
وبلاش نتكلم ف الماضي

والماضي ده كان كله جراح
وعصام قاري فاتحه ع صباح
وصباح مكتئبه من العيشه
خست وبقت وزن الريشه

والريشه على راس الأوباش
عاش كل اللي ظالمنا ..عاش
ونموت علشان غيرنا يعيش
وليحيا العدل بين المهابيش

والعدل وزارة في لاظوغلي
والمجلس جارها الباب ف الباب
وعشان ماتطبق قوانينها
لازم ينطخ النواب .

وصباح خياطه ف شبرا الخيمه
عاشقه وغلبانه والنبي
بتحوش لجل تزيح الغيمه
وتعزل من " أثر النبي "

وعصام سواق على باب الله
إتلموا عليه الحراميه
راح منه في لحظه ياحول الله
قرشين تحويشة السعوديه

وأنا زي الكل بدون تمييز
زهقان وهقول وهعيد تاني
لو كل الغالي هيبقى رخيص
أنا عايز أعيش ف زمن تاني

وكتبت كتابي بدون مأذون
على وردة الحب الصافي
قضينا حياتنا شكوك وظنون
وأغاني لوديع الصافي

عظيمه يامصر يا أرض اللوا
ياكل اللي فاضل في عمر السنين
هشمر هدومي وأعلق لوا
وأطيح ف اللي ماشي وأبطل حنين

والحنين ده طبعه غالب
يخلي جوه القسوه لين
بيملى م الأشواق زكايب
ويبصر الأيام سنيين

ياحبيبي عود لي تاني
وهات معاك لب وسوداني
رجع الماضي في ثواني
حرر القلب السجين

طول ما في "شمس الأصيل"
بتدهب خوص جوه نيلك
مهما كان الليل رزيل
هيطلع الصبح وهجيلك.

بداية

إفتح بيبان الأملْ

ماتخافش م اللي جيْ

مفيش نهار ينتهي

إلا و ف أخره ضيْ

إرمي حُمولك وراكْ

ولا تلتفت ل إمبارحْ

أُنفض تراب آذاك

وقول أنا مسامحْ

يا كل لحظة فشل

خَلًت أماني تضيع

يا كل باب إتقفل

فَتًح وراه مواضيع

يا كل شيء إختفى

وغُلُبت يوم ألقاه

أنا هبتدي م الأول

وهسمي بإسم الله