ياسكرانين بالإنتشاء المر
يا مسجونين بره زنزانة
منين تحلى الحياة وتسر
ولقمة الحر مغموسة بإهانة

اخترنا لك... فكرنا لك...خططنا لك
كل اللي عندك ملكنا.... والباقي لك
يا ايها الوطن التعيس المنتهك
احنا الطريق اللي في آخره مهلكك
احنا المسار اللي يعرقل مسلكك
احنا اللي واقفين بنكعبلك
بنرجعك
بنزحلقك
احنا رموز الانضباط
ابطال كفاح الانبساط
احنا اللي بنفك الارتباط
بين اللي عاش واللي هلك
وهتافين المرحلة
رغم الضياع والبهدله
عاش الملك
مات الملك.

وعشان ماتبقى ملو هدومك
في دنيا الكدب والتزييف
هتخلط ربع كلمة حق
وكبشة كدب جوه رغيف
وتنزل تفتح الدكان
تبيع اللقمة بالمجان
تبالغ في وصف شيء تافه
بإنه الأحلى والأجمل
وإن النقص مش عادة
ده سعي صاحبه للأكمل
تقول ياسلام على الخفه
لواحد دم امه تقيل
و تبقى ماشيلو في الزفه
رئيس لفرقة التطبيل
تجيب العيب على المقتول
لأنه رفض يموت متهان
وهو يعني كان هينول
شهادة بأنه مات إنسان؟!
وايه يعني تكون بآرايل ؟
في زمن كل شيء بالتاتش
هتعدل ليه ف زمن مايل
ما دمت ع الدكة وقت الماتش!
تقول ع الدنيا .. زايله اكيد
وانت فيها متشعبط
وضيع... بس لِبسُه جديد
عبيط عامل بيستعبط!

ولما تنول فيها نصيب
هتطمع في نصيب غيرك.
وترحل عنها وانت غريب
وناسك تحكي عن عيبك!

أنا لا أنتمي لهذا العالم !
لو كنت انتمي لهذا العالم
لقاتلت من اجل البقاء فيه 
لكنني راحل كما رحلوا
وكما يرحلون 
وكما أنكم سترحلون.
فطوبى للعقلاء
في ارض الجنون.
وطوبى للغرباء
 الذين لا ينتمون.

هنِوْرِث ايه !
ما دام احنا أكيد ماشيين
ما دام كل اللي جاي مِتساب
لناس تانية كمان رايحين !
هنِوْرِث ايه في دنيا كلها مِنفاته
ده حتى برد جنتها
جنهم منه منقاده !
هنِورث ايه وكل اللي باقيلنا ساعات
تعالى نسلم العهدة
ونلحق نُصِنا اللي مات
ونتواعد سوا نتقابل ولو في البُعد
يجوز لما هنزرع جسمنا في الارض
هنطرح ورد
وتنبت ارضنا الوَحلة
بناس أحلىَ
وناس عارفه انها ضيوف
وناس بحقيقي عايزه تشوف
وناس راضيه
وناس بالحب مش فاضيه
تشوف بكره وترضَى عليه
 هنِورث ايه !!

ليس البقاءُ أن نحيا الى الابدِ 
ولا الفناءُ أن نضحى جثامينا 
كل الدروبِ تُفضي الى العدمِ
 الا طريق الله يدنو ف يبقينا

خروج آمن

ياأيها الوطن المُفخخُ بالضجيج
والشعارات والخلافات
والمدعين والجهلاء
وأنصاف المتعلمين
وأرباع الشعراء
وجميع الخبراء
والمتاجرين بأموال المساكين
وقروش الدكاكين
وأرزاق الباعة المتجولين
والعملات السليمة في الزمان المزيف
حين لا يبقى طابق فوق طابق
وجفن فوق جفن
وطفل كان يلهو جار طفل
في قلب الشوارع
وفي العمار
حين تتناثر شظايانا
ويحل الدمار
ليس ثمة من خروج
من دهاليز المتاهةِ
والتفاهةِ
غير أن نكون.
لم يعد لنا خيار بألا نكون
لكن..لا أحد يعرف !