أجيب لك ايه وأنا جايلك
أجيب لك أكل ..؟
أكيد شبعان !
أجيب لك ميه
ماهو ريقك أكيد ناشف بقاله زمان !
أجيب لك بطانيه تقيله ... يجوز بردان !
أجيب لك فاكهة ؟
شوية موز على حبتين رمان
أمبارح كنت بفكر فيك
غريبه ، كل ماتخطر ببالي… ألاقيك !
تصدق لما أكلت الموز
لقيت صورتك مطبوعه على قشره
ولما جيت آكل بلح أمهات
لقيت أيدك بتتمد..
تشيل بذرهُ !
دخلت المطبخ ، قلت أعمل شوية شاي
لقيتك بتصب في الفناجيل
ولما جيت أشتكي همي
لقيتك عارف التفاصيل !
قلت اقوم اصلي العصر
لقيتك بتصلي بيا أمام
ولما قلت أعمل خير
لقيتك في الطابور قدام !
صحيت مالنوم على صوتك
بتقرا في جلال وخشوع
لقيت عينك بتلمحني
وتملا جوه عيني دموع
ولما جيت أنادي عليك
لقيتك جوه أحضاني
كأني مافارقتك يوم
كأنك قمت من تاني
وفجأه لقيتني واقف بصلي جنازة
وناس رايحه وناس جايه تقول معلش
وقهوه ساده بتتقدم ...بدون وش
وناس بتقول البقاء لله
ده كان راجل كريم لكن ..
الدوام لله !
جريت عالبيت أنادي عليك
لقيتك بتبص مالشباك
بتضحكي وبتقولي
أنا هلبس وجاي معاك
أنا واعي ...أنا صاحي
انا فاهم بيحصل ايه
أنا عايش مانيش ميت
عشان خاطري... بتزعل ليه ؟
أنا وياك منين ماتروح
أنا سامعك بدون ماتبوح
أنا حاسس بأوجاعك
أنا بسري في أضلاعك
أنا في عقلك بفكر ليك
أنا بنور ضلام لياليك
ولما صوته كان يبعد ...أقول هيروح
أشوف ضله بيسبقني منين ما أروح
وأسمع صوته من تاني
كأني بشوفه قدامي
تقرب خطوتي مني
ده موت ايه ده اللي يبعده عني !!
