تحريض

إفتكر بإنك لسه حيْ
ولسه فاضلك شوية ساعات
وإن اللي راح... وكُل اللي جيْ
شوية تسالي وحبة حاجاتْ
فلازم تشهيص حياتك صحيح
وحتماً هتنسي كل اللي فات
فأصل الحكايه.. إنك تعيش
وتلبس حرير مطرَز بريش
وتطلب مكافأه وحوافز وبونصْ
تفسح مدامتك ، عيالك تهوبصْ

فلو يوم مديرك قالك مفيشْ!
هتاكل في بعضك وياكل ياميش
تعيش جوه مِلكَكْ وتِدفع إيجار
وتِرهنْ حياتك ويشرب سيجارْ

فلازما" وحتما" تقول اللي عندك
تشيل الكِمامه وكل اللي سدك
لإن إنت أصلا" نور العيون
وعالحق دايما" لإنك زبون
تجيب م الكلام المنقي اللي هوَ
تهدد جنابُه ،تجيبله الشاويشْ
يقوم هوَ يُدخُل يجيب م اللي جوهَ
تعيش مستريح و زمايلك تعيش.

اقتباس

إقتبس ...ما دمت مش قادر تفكر 
شاور... مادمت عاجز عالكلام .
هتعييش مادمت بتحاول تعبر 
هتموت لو انت عايش والسلام.

أمل

كل الأماكن بتضحك بس من غير صوت
كل الساعات بتشفي من الألم
لمحة أمل في حياتك بترفض تموت
لما الوجود في قلبك ينتصر عالعدم.

رصاص

مفيش مسافة بين عقلك وأفكارك 
مفيش طريق غير الخلاص ..وخلاص
مادام نويت تمشي ورا أحلامك 
تبقى ضربت الفشل برصاص 

روبابيكيا

معانا فرحة متاخره
ودنيا بتجري ورا آخره
وزعقه بس منحاشه
وليل ممسوك بكماشه
وفجر بس مش طالع
وناس تقرا من الطالع
ياعم ياللي بتندهلي
ورحمة أبوك مانا سامع.

معانا ريال ...براني
وجرح بس....جواني
ودستور و ولاعه
وإعلام و بلاعه
وترعة نص مليانه
ودولة ماشيه عريانه
وثورة ..بس مركوبه
وفكرة ..بس معيوبه
تقولي ثورة من تاني
أقولك .حلوة ...ملعوبه.

معانا معارضه راضيانا
وناس راضيه معارضانا
وقايمه نص فرديه
وفرده .بس مهريه
وهريه ..بس كدابه
وكدب ..بس بمهابه
هتعمل ثورة هابعتلك
جمل تاني ودبابه !

معانا عمله بتعوم
وضلمه من ورا غيوم
وفانوس ..صدا من الحكه
وعفريت خايف من السكه
وسكتنا في آخرها ابواب
وكل باب عليه أكره
وبكره ماسك الأكره
ومابيفتحش.
أنادي عليه بصوت عالي
ولا يسمعش
معانا كل شيء ينفع
ومابينفعش.