السعادة

وبقيت اشوف ان السعادة
إنك تعدي اليوم بخير
مكان تنام /حبة سلام
كلمة " تمام "
لما تعمل شغلك بإنسجام
وشوية ضمير .
انك تبات كل يوم
وانت حاسس بارتياح
انك تحس ان المكان الضيق
،وانت راضي،
 يملى جواك احساس بالبراح.

أنك تُرش الملح ع الأكل الدلع
انك تحس بطعم كل لقمة بتتبلع
أنك تشوف البطانية في الشتا
أختك في الرضاعة
أنك تقول ان السيجارة ديه
هي آخرك في الصياعة
انك تقوم م النوم حاسس بالنشاط
انك ماتهتمش بالفلوس
 من باب لحتياط.

أنك تحس ان الآمان ماشي ف حماك
أنك تشوف الخوف معدي من جنبك
حاسس بإرتباك .
انك تحوش صُحبة لما تتحال عالمعاش
ناس في قلبك جوه سَاكنة
زي قطن جوه مَكنة .
 فجأة يتحول قماش

انك تكون كل حاجه
في دنيا حد ماتعرفوش
أو تضحي بكل حاجه
عشان حد ماشفتهوش
انك تحس بالرضى
كل يوم عن يوم زياده
 هي دي اصل السعادة .

عام جديد

وبودع عام واستقبل عام/وانا كل مافوق برجع وبنام 😴/ العمر بيجري أوام كده ليه؟ /بتنا كتاكيت وصبحنا بانيه! 🐤/ لا جنيه شافع ولا حتى دولار 💵/ولا ليل نافع يطلع له نهار /سدد يارب القرض اياه💰 /فوق منه زياده خمسه امواه 💋/ وارفعلنا راسنا عاليه لفوق / ناكل بقى حبه .. زهقنا ندوق 😠/حوش عنا يارب الناس ديه /واكفينا شر الحراميه🕶/ حراميه بتسرق منا النوم /وبتشرب دم في شهر الصوم /كتر يارب السنة ديه/ظباط رقابتنا الإدارية 👀
لكن راضيين نشرب كولا/ ونسلم دمنا دراكولا😈/ ولاحدش منا جاب سيرة /وكإن زمانا زمن عيرة/وآدي حالنا بيصعب عالكافر /خلى المستور منا يعافر 😭/ لكن يارب عشمنا كبير/ وبندعي بقلب وكل ضمير👐/ قربنا لبعض زي زمان / اغنيا فقرا اشكال ألوان .
وعشان نفرح بسنة جديدة /هكدب وهقول حاجه جديدة/العمر بيجري توماتيكي .... ساعة بتروح وساعة بتيجي⌚
ساعة بتروح وساعة بتيجي ⌚
ساعة بتروح وساعة بتيجي⌚.

.

الى ابنتي في عيد ميلادها الثامن

وبحبك من غير مابصرح
ان انت الجنه اللي ف بالي
وأن انت حياتي اللي بتطرح
كل الأفراح الجايه لي
وان انت الامل اللي يصبر
على ضيقي وهمي المداري
وان أنت كلامي اللي يعبر
عن فرحي وعن كل افكاري
وان انت الباقيه في غيابي
وان انت خلاصة أحبابي
وان أنت في كوباية شايي
 ورقة نعناع وقالب سكر.

وهصرح ليه والناس عارفه
أن أنا من غيرك بيت مهجور
وأن أنت ف حضني مش خايفه
 و أن أنا من ضيك بيت من نور

وعشان العشم اللي ماليكي
والأمل اللي ف ضي عنيكي
راح احب اللعب واشوف ديزني
وأحكي حواديت
وهطنش وكأنه بإذني
رسمك عالحيط
وهصحي ميكي م النوم
وهصالح جيري على توم
وهرجع نيمو لبيته
 وهلبس ديزي هدوم.

ماهو انت طفولتي اللي نسيتها
وانت اللي ف قلبي محبتها
وانت الشمس اللي بتطلع
 من وسط غيوم.