صباح الخير

صباح النسر بيرفرف جوه أعلام مصر
صباح النصر

صباح اللمه على طبق الفول
صباح يفتح كل باب مقفول
صباح الشاي كشري في كوباية أزاز
صباح الكارو والأنابيب وعربيت الجاز
صباح الرقية والبركات
صباح الطحن والأزمات
صباح المستشفى و المرضى
صباح الفوضى .

صباح اللت والعجن
والشمس اللي مابتدخل سجن
صباح الهري والتنطيط
صباح الري بالتنقيط
في بلد النيل
صباح البق اللي ماشربتو
عشان بورتو
صباح القرش اللي متشال
عشان لعيال

صباح النور اللي مابينورش
في بلد السد
والراتب اللي مابيسترش
من السبت ليوم الحد

صباحك زحمة في المترو
بناس كتروا
وناس محشوره في الأوتوبيس
عشان ناس تانيه تنام وتهيص

صباح السكوت اللي معبي كلام
صباح الكتمه اللي جايبه لي صداع و زكام
صباح الزحمة في رمسيس
صباح الطلبه والكراريس
صباح المرار طافح
مايعرف بكره من امبارح

صباح كلمة الحق اللي واقفه في حلق الزور
تنطلق ، تجرح ، تهد السور
صباحك قنبله موقوته
معلقه في التوته
صباحك طلقة مجهوله
طلقتها أمنا الغوله

صباح الضحكه تملى وش مافيه سنان
لكن أنسان
صباح تجاعيد بتحكي شقى لسنين
ونظره طيبه تضحكلك ملانه حنين

صباحك فل ..رغم الكل
ورغم القسوه والجبروت
وساعة الغُلب اللي واقفة ..ومابتفوت
في ذرة أمل جايه في حضن الشمس
رافضه تموت .