ابجدية

قيمة الألف بألوف
خارج عن المألوف
حارس مابين لحروف
واقف على الجنه
فتح البيبان عالباء
حس بذنوبه و باء
ياباري م الأوباء
أرضى بقى عنا
والتاء تُقى وتقيه
والرك ع النية
تاخد بها عنيا
وأديني حرف الثاء.
ثائر بكل ثبات
زمن الثعالب فات
ثوري على الآفات
 لو كل يوم ثانيه

ياجيم جمايلاك كتيرة
 جلد الجمال عيرة
لجل الصحاب والجيرة
تتجمل الحلوات
والحاء حلاوه روح
تشفي منين ماتروح
ريحها تداوي جروح
صعبه على الخواجات
والخاء ياخويا يا خلي
وقت الشدايد ميللي
خانع ياخوف بتجلًي
 رغم إنطواء الدال

والدال دعة ودلال
دعوة بدموع وجلال
تجبر خاطرها الذال
 ترحم بها ذلي .

ياروح مابعدك روح
عطر الحروف بيفوح
راء الكلام بيبوح
لما تعدي الزاي
والزاي زمان سيدي
عدًى مسك إيدى
نوًر نهار عيدي
 ماتقولش كيف وإزاي!

دبح الظلام سكين
حط النقط عالسين
شقشق شروق الشين
 شبورة عا اللي جاي

صبح الصباح عالصاد
كات الرؤى أضداد
زانت حروفنا الضاد
ضفًر ضمايرنا.
والطاء طرق بابي
سلمت له منابي
أصله من أحبابي
 والف على ديارنا

والظاء سبق ظله
صاحب وفي لخلِهُ
عينى عليه تميل لُهُ
تلمح بطرف العين
نقطة تقف عالغين
تمنع غراب البين
 يبقى على حاله

والفاء فتح فمهُ
فايت ولا همهُ
مدح اللي جه ذمهُ
أصله من الأشراف
يقرا في سورة قاف
نال الثواب أضعاف
 حاكم العباد اصناف!

والكاف كبح كيفُه
كشف الكلام زيفُه
لام الحبيب طيفُه
 عدًى ولا سلم

واللام تقف ع النون
لولا المحبة م ألوم
ميم الملامة تمون
 لما الصعاب بتهون

هاء الهلال هنا هلْ
همس الهوا في الطلْ
واو الورود والفلْ
 ترضي أمانينا

والياء ياعيني ياوعدي
توب الكلام سعدي
واللي نَسج بعدي
 يلضم حروف اسامينا.

الناس

في ناس ساقعة مابتحسش
تِبَرًد حُضنك الدافي
وناس من كلمة بتقولها
تعكر دمك الصافي
وناس تبخل عليك بسلام
وناس تكره تعيش في سلام
وناس من كلمة تعاتبها
 تجيب اللي وراك قدام

وناس خلفية في الصورة
وناس تافهة ومغرورة
وناس ولا حاجه م الأول
 لكن عايشه ومستوره

وناس كدابه بالفطرة
وناس تديها ولا ترضى
وناس محشورة في أمورك
تشاركك حتى في هدومك
ولو تبعد هتلزق لك
ويوم تآمنها هتخونك
وناس تغسلها ماتكشش
وناس تفردها ماتلمش
وناس صُحبِتها ماتهمش
 هتبعد بردو هيجولك