أفتح كتاب وأقفل كتاب وادور عاللي بدع السبب
ألقى براحك ملء الوجود،
وألقى في قلب القلب دوود
يخرج وقت ما الروح تفوت ..
عند اللي خلق الوجود ويا العدم
ألقى الأجابه عالأسئله بالمسطره
من بين كلام كتابك تتقرا
لمن يرى !
ياحكمتك
يارب باعث كل حي من نفختك
يارب يا خالق الوجود والعدم
احنا العدم !
احنا اللي فكينا اللجام
وحملنا تبعات الكلام
احنا اللي من عليها فان
احنا الآنام
وأتذكرك
يارب من بعد طول البعاد
من بعد طول الجحود
ألقى العدم يرجع وجود
وتدب في قلبي الحياه من جديد
والنبض ينفض في الوريد
وتدوب كل الأسئله والمسأله في لحظة خشوع
يامحلا ذلي والخضوع
في حضرتك
في قدرتك
في قوتك
يارب ياخالق الحياه والموت
ايه يعني اموت !
مادام هتختفي بينا الحواجز والسدود
أيه يعني ألاقي او ما ألتقيش
مادام هعيش
في رحمتك.
ايه يعني أتوه في عالم غريب !
ما أنت القريب .
وأزاي يعني قلبي يتوجع !
وأنت الحبيب
أرضني يامولاي بخدمتك
وأجعل عطائي كله ...لك
أنت السلام
ومنك السلام
تباركت ياذا الجلال والأكرام
ليست هناك تعليقات:
إرسال تعليق